Oskar Alegria zinemagilearen azken lana, ‘Zinzindurrunkarratz’ aurkeztuko dute ostiralean Larraintzarren, ostiral kulturalen baitan. Zinemagilea ere bertan izanen da, eta elkarrizketa egiteko aprobetxatu dugu Egun Ero saioan. Pelikulan lagun izan duen Paolo III. astoa aroztegiarra da, gainera, Atezkoa. Arratsaldeko 19:00etan izanen da ekimena.
“Ahaztutako bide bat. Etxeko kamera zaharra. Isiltasuna.
Zinemagile batek bere herriko artzainek mendira egiten zuten transhumantziaren bidea berreskuratzea erabakitzen du, baina, ez du aurkitzen ibilbide zehatza adierazteko lekuko bizirik. Bere ideia bere familiaren super-8 kamera zaharrarekin filmatzea da, baina 41 urte erabili gabe igaro ondoren, ez duela soinurik jasotzen ohartzen da. Ahaztutako bidea eta kamera isila bihurtuko dira, Paolo izeneko astoarekin batera, oroitzapenez, galderaz eta isiltasunez betetako bidaia baten protagonistak”.
