Podcast: Play in new window | Download
Gabon usaina dago gure artean. Abenduan sartu gabe oraindik, baina urtea bukatzeko prestakizun guztiak abian dira. Bideojokoenak, baita: The Game Awards sariek 2024ko jokorik onenak aurkeztu dizkigute… hedabide eta enpresa handienentzat, gutxienez.
Kategorien zerrenda hazten doa, nola ez. Urteko jokorik onenaren hautagaiei genero desberdinetako sariak, zuzendaritzarik onena, soinua zein musika edo familiarentzako lanik onena gehitu zaizkie, besteak beste.
Ohi bezala, Game Erauntsiatik zerrenda errepasatu gura izan dugu. Aurten ere denetariko estreinaldi handiak —zein txikitik hasita handira jo dutenak— ikusi ditugu: Astro Bot, Balatro, Black Myth: Wukong, Final Fantasy VII Rebirth eta Metaphor: ReFantazio nabarmendu dituzte Geoff Keighley kazetariaren taldekoek.
Bestelako ustekabekoa ere ikusi dugu; izan ere, DLC edo espantsio bat sartu dute GOTYaren kategorian. Elden Ring: Shadow of the Erdtree ikaragarriaz gabiltza, noski.
Halako hautagaiekin, ezin dezakegu irabazle argirik izendatu. Antzekoa gertatu da gainerako kategorietan, hainbat zalantza eduki baititugu.
Zuk argi daukazu? Tira, ba urte bukaeran gure ekimenean adieraz dezakezu. TGAren ekitaldia eklipsatuko dute berriro Game Erauntsia sariek: abendu bukaeran zuon iritziaren zain egongo gara!
