Podcast: Play in new window | Download
Uzten baduzu leiho bat zabalik gauez, buru bat utziko duzu zabalik airera. Uzten baduzu leiho bat zabalik gauez, airea sartuko zaizu begietan barrena. Uzten baduzu leiho bat zabalik gauez, jada borroka egiteko indarrik ez duzulako da, ahitu egin zaizkizulako bizitzari begiratzeko moduak, merkurio hondarrak ezin harrapatuz bezala zabiltzalako, arnasa harrapatu nahian.
Uzten baduzu leiho bat zabalik gauez, zure esku ez dagoen zerbait gertatzea nahi duzulako da. Uzten baduzu leiho bat zabalik gauez, nahi ez duzun zerbait gertatzea nahi duzulako da. Leihoak itxita ateak itxita euritakoak zabalik begiak itxita, ez zaizu borroka egiteko indarrik gelditzen. Uzten baduzu leiho bat zabalik gauez, seguru sentitu nahi ez duzulako da.
